ကဗျာဆရာ ပွင့်သစ် (ကရိန်ကန်)။ ဘလော့ဂ်ဂါဖိုးဇေ။ မကဒတရဲဘော်မြင့်အောင်။ ရင်းနှီးသူအားလုံးကခေါ်ကြတဲ့ ကိုဂုရု၊ နိုဝင်ဘာလ ၂၀ ရက်၊ ကြာသပတေးနေ့မနက် ၁ နာရီ ၂၀ မိနစ်တွင် မဲဆောက်ဆေးရုံကြီး၌ ကွယ်လွန်သွားခဲ့သည်။ ကိုဂုရုရဲ့ ရုပ်အလောင်းကို စနေနေ့မှာ အသုဘပို့ဆောင်မည် ဖြစ်ပါသည်။
….
မနေ့က ညနေ ၅ နာရီခွဲလောက်မှာပဲ ကျမအိမ်ရှေ့ကနေ သူ့ဇနီးကို ကဗျာဆရာမောင်လွမ်းဏီရဲ့အိမ်မှာ သူရှိနေမယ်ဆိုတဲ့အကြောင်း ပြောသွားသေးတယ်။ (သူ့ဇနီးက အိမ်ကို ညနေဆိုရင် လာလည်နေကျလေ။) ည ၇ နာရီလောက်ကျတော့ မူးလဲသွားလို့တဲ့ ဆေးရုံကို တင်လိုက်ရတယ်။ အဲဒီကတည်းက စပြီးသတိမရတော့တာပါ၊ သူ့ဇနီးကရင်မလေး ဆေးရုံကပြန်လာတော့ သတိမရသေးဘူးတဲ့၊ နောက် ၁၀ နာရီလောက်ကျတော့ တယောက်ကလာပြောတယ်။ စိတ်ကိုတင်းတင်းထားပါတဲ့။ ဦးနှောက်သွေးကြောပြတ်သွားတာတဲ့၊ မရတော့ဘူးတဲ့။ လက်မှတ်ထိုးရတော့မယ်တဲ့။
ကျမနဲ့သိတဲ့လူတယောက် ညနေခင်းကပဲ အကောင်းပကတိနဲ့ တွေ့လိုက်ရပါသေးတယ်။ အခု ဆေးရုံမှာ သတိမရတော့ဘူးဆိုတော့ ရင်ထဲမှာ ပြောမပြတတ်အောင်ကို အံ့သြတုန်လှုပ်မိတယ်။ လပိုင်းမျှသာပေါင်းသင်းရသေးတဲ့ ဇနီးသည်အတွက်လည်း ယူကျုံးမရ ခံစားမိသေးတယ်။ သူ့ဇနီးကရင်မလေးကတော့ တရှုံ့ရှုံ့နှင့် ငိုနေသည်။ သူကကျမတို့အိမ်မှာ လာအိပ်တယ်။ တညလုံးလည်း အိပ်မပျော်ကြပါဘူး။ မနက် ၂ နာရီလောက်ကျတော့ ဆေးရုံက ဖုန်းဆက်လာတယ်။ ဆုံးသွားပြီတဲ့။
ကျမနဲ့စပြီးရင်းနှီးတာကတော့ ဂုရုဆိုတဲ့ နာမည်နဲ့ပါပဲ။ စကားပြောရင် မပွင့်တပွင့်နဲ့ဖြစ်ပေမယ့် စာတွေ ကဗျာတွေ အရေးကောင်းတယ်။ ကိုဂုရုက လူတော်တယောက်ပါ။ သူမူးလာရင်တော့ ကျမတို့ကို ဘုဘောက်ပြောတတ်ပေမယ့် အမူးပြေသွားရင်တော့ သူမဟုတ်သလိုပါပဲ။ (ဘုဘောက်ပြောရန်ရှာရင်တော့ ကျမစိတ်တိုတာပေါ့လေ။ ) နောက်တရက်ကျရင် အကောင်း။ အရင်လိုပဲ ဖော်ဖော်ရွေရွေ ဆက်ဆံတယ်။ သူ့ကို ဘယ်လိုနားလည်းရမလဲ မသိဘူးလို့ ကျမ ခဏခဏပြောဖူးတယ်။ နောက်ပြီး သူမိန်းမမရခင်က သူကြိုက်တဲ့ ကောင်မလေးတွေအကြောင်းလည်း လာလာပြောဖူးတယ်။ အခုတော့ ကျမကို လာတိုင်ပင်မယ့်လူတယောက် လျော့သွားပြီလေ။
ကိုဂုရုတယောက် ကောင်းရာသုဂတိလားပါစေ။..
No comments:
Post a Comment