ဥပဒေအထက်မှာ လွှတ်တော်ရှိတယ်လို့ ဝေဖန်ရေးသားထားတဲ့ ဒေါက်တာဆိတ်ဖွား အမည်ရ ဘလော့ရေးသူကို လွှတ်တော်ကနေ စုံစမ်းရေးကော်မရှင်ဖွဲ့ပြီး ဖော်ထုတ်အရေးယူပေးဖို့ အမတ်တဦးဖြစ်တဲ့ ဒေါက်တာစိုးရင်က အဆိုတင်သတဲ့။ ဒီအဆိုကိုလည်း ကော်မရှင်ဖွဲ့သင့်တယ်လို့ ထောက်ခံတဲ့ အမတ်ပေါင်းကလည်း ၃ ပုံ ၂ ပုံလောက်ရှိသတဲ့။ ဒီနေ့အတွက် လူမှုကွန်ယက် ဖေ့ဘွတ်ပေါ် တော်တော်လေး နေရာယူခဲ့တဲ့ ရှယ်ကြတဲ့ အကြောင်းအရာ ဖြစ်ရပြန်တယ်။
မြောက်ပိုင်းကချင်ပြည်နယ်မှာ စစ်ပွဲတွေ ဆက်တိုက် ဖြစ်နေချိန်၊ ကေအိုင်အေ ဗဟိုဌာနကို ဒီအပတ်အစောပိုင်းက လက်နက်ကြီးကျလို့ ပြည်သူတွေ သေနေရချိန်၊ ပြည်ထောင်စုလွှတ်တော် ဥပဒေပြုအမတ်တွေက အရေးကြီးအဆိုအဖြစ် တင်သွင်းလိုက်တဲ့ကိစဟာ နားလည်ရခက်စေတယ်။ ဒီအကြောင်းထက် တခြား အရေးကြီးတဲ့ အကြောင်းများ မရှိတော့လို့လားလို့ ပြောကြ ဆိုကြ ဝေဖန် အမျက်ထွက်ကြ၊ ဟာသ လုပ်ကြသူတွေနဲ့ တော်တော်တော့ ညံစီသွားတယ်။
ဘာပဲပြောပြော ဒေါက်တာဆိတ်ဖွား ဘယ်သူလဲလို့ စိတ်ဝင်တစား အဲ့ဘလော့ဂ်ကို ပထမဆုံး သွားဖတ်ဖြစ်တော့ ဝေဖန် လေကန်နဲ့ တိုင်းရင်းသားနဲ့ တက်ကြွလှုပ်ရှားသူများကို ပယ်ပယ်နယ်နယ် ဆော်တဲ့ ဘလော့ဂ်တခုသာ ဖြစ်ပါတယ်။ ဘလော့ဂ်ရေးတတ်ရုံနဲ့ တင်ချင်ရာ တင်တဲ့ ဘလော့ဂ်က ပို့စ်ကို အမတ်မင်းများက ဆတ်ဆတ်ထိမခံ အရေးယူဆောင်ရွက်ဖို့ ဘာကြောင့် အဆိုတင် ဆုံးဖြတ်ကြပါသလဲ။ ဘလော့ဂ်ရေးသူက ဘယ်သူဘယ်ဝါ မသိရဘဲ ဘယ်လိုဘယ်ပုံ အရေးယူကြမှာလဲ။
မီဒီယာ လွတ်လပ်ခွင့် အတော်အသင့်ရနေပြီလို့ ဆိုတဲ့ မြန်မာနိုင်ငံမှာ လွတ်လပ်စွာ ပြောဆို ရေးသားခွင့်ကို ထိန်းချုပ်ချင်လို့လား။ နောက်လူတွေ မရေးရဲအောင် ပညာပြချင်လို့လား။ သို့တည်းမဟုတ် နောက်ကွယ်က ၀ှက်ဖဲတွေကို ဆော်ချင်လို့ လုပ်သလား။။ လားပေါင်းများစွာ...
ဒါကတော့ ဆက်စပ် သတင်းပါ။ ဧရာဝတီ ဘလော့ဂ်က ပို့စ်ပါ။
ဒေါက်တာဆိတ်ဖွားကို အရေးယူဖို့ လွှတ်တော်မှာ မဲခွဲ
~ခင်ဦးသာ ~
ဘလော့တခုမှာ
ဒေါက်တာဆိတ်ဖွား ဆိုသူက လွှတ်တော်နဲ့ လွှတ်တော် ကိုယ်စားလှယ်တွေကို
ဝေဖန်ထားတဲ့အတွက် သူ့ကို စုံစမ်း အရေးယူမယ့် အထူးကော်မရှင် တခု လွှတ်တော်မှာ
မကြာမီ ပေါ်ပေါက်လာဖွယ်ရှိနေပါပြီ။ပြည်ထောင်စု ကြံ့ခိုင်ရေးနှင့်ဖွံ့ဖြိုးရေးပါတီ ကိုယ်စားလှယ် ဒေါက်တာစိုးရင်က - အင်တာနက်တွင် ဖော်ပြထားသော “Above the Law” ခေါင်းစဉ်ပါ ဒေါက်တာ ဆိတ်ဖွား၏ ဝေဖန်ချက်နှင့် ပတ်သက်၍ ပြည်ထောင်စုလွှတ်တော်က ကော်မရှင်ဖွဲ့၍ စုံစမ်းစစ် ဆေးဆောင်ရွက်ပေးဖုိ့ အရေးကြီး အဆိုတရပ်ကို လွှတ်တော်မှာ တင်သွင်းလိုက်ပါတယ်။
ဒေါက်တာဆိတ်ဖွား ကလောင် ပိုင်ဆိုင်သူ မည်သူမည်ဝါ ဆိုတာ အများက မသိကြသေးပါ။
လောလောဆယ်တော့ အင်တာနက်မှာ ကလောင်စွမ်းထက်တဲ့ ဒေါက်တာဆိတ်ဖွားနာမည်က လွှတ်တော်ထဲရောက်လာပါပြီ။
ဖွဲ့စည်းပုံ အခြေခံဥပဒေဆိုင်ရာ ခုံးရုံး၊ စာရင်းစစ်ချုပ် ဥပဒေ စတဲ့ ကိစ္စတွေကို ဒေါက်တာဆိတ်ဖွားက ဝေဖန်ထားတယ်၊ ဥပဒေ၏ အထက်မှာ လွှတ်တော်ရှိသလား ဆိုတာရယ်၊ လွှတ်တော် ဥက္ကဋ္ဌ တွေနဲ့အပေါင်းပါတွေ ဆိုတဲ့ စကားလုံးတွေဟာ လွှတ်တော်နဲ့ အမတ်တွေရဲ့ ဂုဏ်သိက္ခာကို လုံးဝ ထိခိုက်စေတယ်လို့ ပြည်ထောင်စု ကြံ့ခိုင် ရေးနှင့်ဖွံ့ဖြိုးရေးပါတီမှ ပြည်သူ့လွှတ်တော် ကိုယ်စားလှယ် ဦးဝင်းဦးက ဧရာဝတီကို ပြောပါတယ်။
“ဒေါက်တာ ဆိတ်ဖွား ဘယ်သူဘယ်ဝါ ဆိုတာတော့ ကျနော်တို့ မသိပါဘူး၊ ဒါပေမယ့် စုံစမ်းရင် သိမှာပါ၊ ဒီလိုစည်း မဲ့ ကမ်းမဲ့ရေးချင်တိုင်း ရေးလို့မရပါဘူး” လို့ ဆိုပါတယ်။
အဲဒီအဆိုကို မဲခွဲ ဆုံးဖြတ်ရာမှာ ပြည်ထောင်စုလွှတ်တော် ကိုယ်စားလှယ် စုစုပေါင်း ၆၀၀ ကျော်မှာ ကြားနေမဲ ထောက်ခံမဲ ၃၄၀ ကျော်၊ ကန့်ကွက်မဲ ၁၅၀ ကျော်နဲ့ ကြားနေ ၄၀ ကျော်နဲ့ အဆိုက အောင်မြင်ခဲ့ပါတယ်။ တပ်မတော်သား ကိုယ်စားလှယ်တွေကတော့ ကန့်ကွက်မဲ ပေးကြတယ်လို့ သိရတယ်။
လွှတ်တော်ဆိုင်ရာ လုပ်ထုံးလုပ်နည်းတွေနဲ့အညီ အရေးအယူ ဆောင်ရွက်ဖို့ ပြည်ထောင်စု လွှတ်တော်က ကော်မရှင်ဖွဲ့ စစ်ဆေးပြီးရင်တော့ ဒေါက်တာဆိတ်ဖွား ဘယ်သူ၊ ဘယ်ဝါဆိုတာ ပေါ်လာမည်လား၊ တကယ်အရေးယူခံရမှာလား ဆိုတာတော့ စောင့်ကြည့်ကြရတော့မည် ဖြစ်ကြောင်း…….
No comments:
Post a Comment