ခရမ်းရောင် လက်သန်းပိုင်ရှင်တွေ အဆုံးအဖြတ်ပေးခဲ့တဲ့ မြန်မာပြည်ရဲ့ နိုဝင်ဘာလ အထွေထွေရွေးကောက်ပွဲကြီးပြီးလို့ တလကျော်ကြာခဲ့ပြီ။ (ကိုယ်ကတော့ သမိုင်းဝင်ရွေးကောက်ပွဲအတွက် အလုပ်တာဝန်နဲ့ ခရီးထွက်ရတာမို့ ကြိုတင်မဲပေးခဲ့ရတာကြောင့် ခရမ်းလက်သန်းပိုင်ရှင်တော့ မဖြစ်ခဲ့ပါ။ သို့သော် ဘယ်လိုနည်းဖြင့်ဖြစ်စေ တသက်တာမှာ ပထမဦးဆုံး ဆန္ဒပြုခဲ့ရသည့်အတွက် ပျော်ရွှင်ရပါတယ်။)
ဒီကနေ့ ရွေးချယ်ခံ အမျိုးသားဒီမိုကရေစီအဖွဲ့ချုပ် ကိုယ်စားလှယ်တွေ ဦးဆောင်ပြီး တနိုင်ငံလုံးအနှံ့ အမှိုက်ကောက်ကြတဲ့ စနေ၊ တနင်္ဂနွေ ရက်သတ္တပတ်လည်း ဖြစ်တယ်။ အမှိုက်ကောက် ကမ်ပိန်းကို အားလုံးက ကိုယ့်အသိနဲ့ကိုယ် ပါဝင်ကြတယ်။ ကြည်နူးစရာ မြင်ကွင်းတွေကို ဖေ့ဘုတ် လူမှုကွန်ရက်စာမျက်နှာတွေပေါ်က ဆိုရှယ်မီဒီယာ အသုံးပြုသူရော သတင်းဌာနတွေရဲ့ စာမျက်နှာတွေကပါ မြင်ရတယ်။ မြန်မာပြည်မှာတော့ ဖေ့ဘုတ်လူမှုကွန်ယက်က လူသုံးအများဆုံးမို့ “မျက်နှာစာအုပ်” မှာဝင်ကြည့်ရုံနဲ့ ဗဟုသုတ အထွေထွေကို ခရီးစရိတ်မကုန် စာတွေ့မြင်တွေ့နိုင်ပေသည်။ ပြည်ပရောက် မြန်မာတွေအတွက် အလွမ်းပြေပေါ့။ :)
တချို့လည်း အမြင်မတူတာတွေ ပြောကြ ရေးကြရင် အမှိုက်ကောက်တာကို ဝေဖန်တာ၊ ထောက်ခံတာလည်း ရှိရဲ့။ တချို့ သရော်စာရေးတတ်သူများကတော့ စာတပုဒ်အဖြစ် ဖန်တီးကြပီ။ ထိုသူတို့အား အားကျမိသည်။
NLD ခေါင်းဆောင်ဒေါ်အောင်ဆန်းစုကြည်ကတော့ အမှိုက်ကို စနစ်တကျ ပစ်ခြင်းသည် ဘ၀အလေ့အကျင့်သာ ဖြစ်သည်။ ထို အမှိုက်ကောက် ကမ်ပိန်းကိုလည်း ပုံမှန်လုပ်ဆောင်သွားမည်ဟု ဆိုသလို သူမ ကိုယ်တိုင်လည်း သူမကိုယ်စားပြုတဲ့ ကော့မှူးမြို့နယ်မှာ စံပြအဖြစ် ဦးဆောင်ပြီး အမှိုက်ကောက်ခြင်းအမှု ဆောင်ရွက်ခဲ့ပါတယ်။ သြဇာကြီးလှတဲ့ သူမ စကားကို ပြည်သူအများစုက နားထောင်ပြီး လိုက်ပါဆောင်ရွက်ကြတယ်။ တချို့ကလည်း သူမကို ပြည်သူ့ အာဏာရှင် ၊ တချို့ကလည်း သြဇာရှင် လို့ တင်စားကြတယ်။ ကျမကတော့ သြဇာရှင် လို့ မြင်မိတယ်။
ဘာပဲပြောပြော အရင်ဆို ရန်ကုန်ရောက်လေတိုင်း အမှိုက်တွေနဲ့ ပြည့်နေတဲ့ လမ်းကြားတွေ၊ စာသင်ကျောင်းရှေ့က အမှိုက်ပုံကြီးတွေနား ဖြတ်သွားရတာ၊ မိုးတွင်းဆို အနံ့အသက်မကောင်းလို့ အသက်ရှုမ၀တာတွေ မကြုံရတော့ဘူးပေါ့။ အမှိုက်ကောက်ရာမှာ ပူးပေါင်းပါဝင်သူများ ကျေးဇူးပါ။
No comments:
Post a Comment